TGAU Ffilm a'r Cyfryngau Digidol

Mae astudio ffilm a’r cyfryngau digidol yn caniatáu dysgwyr i brofi sut y gall ffilm a’r cyfryngau digidol siapio dealltwriaeth o’r byd cyfoes ac i ddatblygu’n ddinasyddion digidol gwybodus.

Bydd TGAU Ffilm a’r Cyfryngau Digidol yn darparu cyfoeth o gyfleoedd i ddatblygu creadigrwydd, sgiliau cyfathrebu a chwilfrydedd trwy ddysgu drwy brofiad.

Bydd y cymhwyster yma’n ysbrydoli dysgwyr i ddatblygu’n bobl sy’n meddwl yn wreiddiol ac yn llawn dychymyg, sydd yn gallu sylwi a myfyrio ar eu profiadau a’u rhannu’n hyderus.

Ar beth fydd dysgwyr yn cael eu hasesu?

• Arddangos gwybodaeth a dealltwriaeth o amrywiaeth eang o gynnyrch ffilm a’r cyfryngau digidol.
• Defnyddio sgiliau wrth gynhyrchu ffilm neu gynnyrch cyfryngau digidol i wireddu bwriadau creadigol.
• Archwilio, creu a datblygu syniadau a thechnegau creadigol i gynhyrchu cynnyrch ffilm neu gyfryngau digidol gyda rheolaeth dechnegol gynyddol.
• Myfyrio ar eu gwaith eu hunain a gwaith eraill a’i werthuso.

Sut bydd dysgwyr yn cael eu hasesu?

• Arholiad (30%) yn targedu gwybodaeth a dealltwriaeth hanfodol, sylfaenol.
  • Bydd yr arholiad yma’n cynnwys asesiad digidol, ar-y-sgrîn.
• Asesiad di-arholiad (70%) sydd yn gorfod cynnwys portffolio ac aseiniad. Bydd y ddau’n cael eu marcio gan athrawon a’u safoni gan y corff dyfarnu. Caiff yr aseiniad ei osod gan y corff dyfarnu a rhaid iddo gynnwys elfen o asesiad digidol.

I gael rhagor o fanylion am bwrpas a nodau, cynnwys a threfniadau asesu'r cymhwyster yma, darllenwch y cynnig dylunio llawn.

Mae fersiwn sy’n addas ar gyfer pobl ifanc hefyd ar gael.