TGAU Drama

Mae astudio drama’n caniatáu i ddysgwyr brofi cyfathrebu corfforol a llafar mewn amrywiaeth o gyd-destunau cymdeithasol, diwylliannol a hanesyddol. Mae hefyd yn datblygu gwybodaeth ynglŷn â sut mae drama a theatr yn cael eu datblygu a’u perfformio.

Bydd TGAU Drama yn darparu cyfoeth o gyfleoedd i ddatblygu creadigrwydd, sgiliau cyfathrebu a chwilfrydedd trwy ddysgu drwy brofiad. Ochr yn ochr â hyn, byddan nhw’n cael arddangos gwybodaeth a dealltwriaeth hanfodol am amrywiaeth eang o ddrama sydd wedi eu creu a’u perfformio gan eraill.

Bydd y cymhwyster hwn yn ysbrydoli dysgwyr i sylwi ar eu profiadau, eu mynegi a’u rhannu’n hyderus.

Ar beth fydd dysgwyr yn cael eu hasesu?

• Arddangos gwybodaeth a dealltwriaeth ynglŷn â sut mae amrywiaeth eang o ddrama a theatr yn cael eu datblygu a’u perfformio gan eraill.
• Defnyddio sgiliau theatrig wrth berfformio a/neu ddylunio, i gyfathrebu bwriadau artistig gyda rheolaeth a soffistigeiddrwydd.
• Archwilio, creu a datblygu syniadau mewn ymateb i symbyliad i wireddu bwriadau artistig mewn perfformio a dylunio.
• Myfyrio ar eu gwaith eu hunain a gwaith eraill a’i werthuso.

Sut bydd dysgwyr yn cael eu hasesu?

• Arholiad gwerth 30%o’r cymhwyster, yn targedu gwybodaeth a dealltwriaeth hanfodol sylfaenol.
  • Bydd yr arholiad yma’n cynnwys asesiad digidol, ar-y-sgrîn.
• Uned perfformiad ymarferol gwerth 30% o’r cymhwyster, a gaiff ei gosod gan y corff dyfarnu a’i marcio gan y corff dyfarnu, gyda’r opsiwn i ddysgwyr gael eu hasesu ar eu perfformiad neu eu sgiliau dylunio.
• Uned dyfeisio gwerth 40% o’r cymhwyster a gaiff ei gosod gan y corff dyfarnu, a gaiff ei marcio gan athrawon a’i chymedroli gan y corff dyfarnu, gyda’r opsiwn i ddysgwyr gael eu hasesu ar eu perfformiad neu eu sgiliau dylunio.

I gael rhagor o fanylion am bwrpas a nodau, cynnwys a threfniadau asesu'r cymhwyster yma, darllenwch y cynnig dylunio llawn.

Mae fersiwn sy’n addas ar gyfer pobl ifanc hefyd ar gael.