TGAU Cyfrifiadureg

Mae cyfrifiaduron a chyfrifiadureg yn ganolog i’n bywydau o ddydd i ddydd – mae ym mhob man o’r consolau gemau yn ein cartrefi i’r peiriannau achub bywydau yn ein hysbytai. Mae astudio cyfrifiadureg yn rhoi set unigryw o sgiliau i ddysgwyr i ddatrys problemau bob dydd yn greadigol.

Bydd dysgwyr sy’n astudio’r cwrs TGAU Cyfrifiadureg newydd yma’n datblygu dealltwriaeth ddyfnach o sut y mae cyfrifiadureg yn gosod sail i’n byd digidol ac yn cynnal y dyfeisiadau rydyn ni’n eu defnyddio o ddydd i ddydd.

Bydd y cymhwyster yma’n helpu dysgwyr i gymhwyso meddwl yn gyfrifiadurol a datblygu’r sgiliau rhaglennu ymarferol a’r hyder sydd ei angen arnyn nhw i fynd i’r afael â phroblemau yn y byd go iawn trwy greu, gwella a phrofi codau ar gyfer meddalwedd a systemau.

Ar beth fydd dysgwyr yn cael eu hasesu?

• Pensaernïaeth cyfrifiaduron a systemau.
• Strwythur systemau a sut maen nhw'n cyfathrebu.
• Cylch oes datblygu meddalwedd.
• Cysyniadau rhaglennu.
• Ymchwilio i broblemau cyfrifiadureg.
• Dylunio atebion a defnyddio modelu data.
• Defnyddio iaith raglennu benodol i ysgrifennu, profi a mireinio codau.

Sut bydd dysgwyr yn cael eu hasesu?

1. Arholiad ar-y-sgrîn (50%) a gaiff ei sefyll yn y flwyddyn olaf o astudio: gan ganiatáu i ddysgwyr ddangos eu gwybodaeth a’u dealltwriaeth gyfrifiadureg.
2. Asesiad codio (50%) a gaiff ei sefyll yn ystod y flwyddyn olaf o astudio: gan ganiatáu i ddysgwyr ddefnyddio eu sgiliau, eu gwybodaeth a'u dealltwriaeth mewn asesiad ymarferol.
   • Bydd yr asesiad yma’n cael ei osod a'i farcio gan y corff dyfarnu.
   • Bydd y cyd-destun ar gyfer yr asesiad codio yn cael ei ryddhau i ddysgwyr yn ystod Blwyddyn 10, gan gynnig ffocws iddyn nhw ddatblygu eu sgiliau ymarferol ac annog cydweithio ag eraill drwy gydol eu dysgu.

I gael rhagor o fanylion am bwrpas a nodau, cynnwys a threfniadau asesu'r cymhwyster yma, darllenwch y cynnig dylunio llawn.

Mae fersiwn sy’n addas ar gyfer pobl ifanc hefyd ar gael.