Dyfarniad Lefel 2 mewn Cymraeg Craidd Ychwanegol

Mae dysgwyr yn caffael ac yn datblygu eu sgiliau iaith ar wahanol gyflymder, ac mae hyn yn arbennig o wir i'r rhai sy'n astudio Cymraeg mewn ysgolion Saesneg. Mae'r cymhwyster ychwanegol yma wedi'i anelu at ddysgwyr sy'n astudio TGAU Cymraeg Craidd ac sy'n barod i ddatblygu eu sgiliau Cymraeg ymhellach.

Bydd y Dyfarniad Lefel 2 mewn Cymraeg Craidd Ychwanegol newydd yn cynnig cyfle i ddysgwyr mewn addysg cyfrwng Saesneg i fagu profiad a hyder wrth ddefnyddio’r Gymraeg o ddydd i ddydd a symud ymlaen yn gynt ac ymhellach ar hyd y continwwm ar gyfer dysgu Cymraeg.

Bydd y cymhwyster ychwanegol hwn yn ysbrydoli dysgwyr ac yn rhoi’r hyder a'r uchelgais iddyn nhw ddefnyddio a mwynhau’r Gymraeg yn eu bywyd, eu dysgu a'u gwaith.

Sut mae'r cymhwyster yn edrych?

Bydd y cymhwyster yn cynnwys dwy uned o faint cyfartal:

• Bydd un uned yn canolbwyntio ar gyfathrebu llafar estynedig: deall, ymateb a sgwrsio’n ddigymell
• Bydd un uned yn canolbwyntio ar ysgrifennu estynedig. Gan ymateb i'r pwnc 'Y Gymraeg yn fy Ardal i', bydd dysgwyr yn ymchwilio, yn cynllunio ac yn defnyddio eu sgiliau iaith i gyflwyno gwybodaeth mewn ffordd wreiddiol

Ar beth fydd dysgwyr yn cael eu hasesu?

Bydd yr uned cyfathrebu llafar estynedig yn asesu gallu dysgwr i:

• Gyfathrebu'n ddigymell ac i ryngweithio â siaradwyr cyfarwydd ac anghyfarwydd.
• Cyfathrebu gwybodaeth, dealltwriaeth, syniadau, barn a theimladau.
• Ymateb i farn eraill.
• Defnyddio iaith idiomatig, cywair priodol, goslef priodol a dealltwriaeth o ramadeg i gyfoethogi mynegiant mewn amrywiaeth o gyd-destunau.

Bydd yr uned ysgrifennu estynedig yn asesu gallu dysgwr i:

• Ymchwilio a deall testunau amrywiol.
• Defnyddio amrywiaeth o strategaethau i grynhoi, coladu, cymharu a dadansoddi gwybodaeth.
• Cyfathrebu a chyfleu ystyr yn ysgrifenedig.

Sut bydd dysgwyr yn cael eu hasesu?

• Bydd cyfathrebu llafar estynedig yn cael ei asesu trwy siarad a gwrando. Bydd yr uned hon yn cael ei hasesu gan y corff dyfarnu gan ddefnyddio dulliau digidol, a bydd yn ei gwneud yn ofynnol i ddysgwyr gyfathrebu a rhyngweithio ar lafar mewn modd digymell.
• Bydd ysgrifennu estynedig yn cael ei asesu drwy ddarllen ac ysgrifennu. Bydd yr uned hon yn cael ei hasesu gan athrawon a'i chymedroli gan y corff dyfarnu.
• Bydd y cymhwyster yn cynnig ardystio unedau ar gyfer dysgwyr sy'n llwyddo i gwblhau pob uned. Bydd unedau'n cael eu graddio fel Pasio, Teilyngdod neu Ragoriaeth.
• Gall dysgwyr sydd wedi cwblhau'r ddwy uned yn llwyddiannus ennill Dyfarniad Lefel 2 mewn Cymraeg Craidd Ychwanegol.

I gael rhagor o fanylion am bwrpas a nodau, cynnwys a threfniadau asesu'r cymhwyster yma, darllenwch y cynnig dylunio llawn.

Mae fersiwn sy’n addas ar gyfer pobl ifanc hefyd ar gael.